Bashkëshortja e Erion Veliaj, Ajola Xoxa, i është drejtuar Gjykatës së Posaçme kundër Korrupsionit dhe Krimit të Organizuar (GJKKO) me një kërkesë për ndryshimin e masës së sigurisë ndaj saj.
Xoxa, e cila ndodhet në javët e fundit të shtatzënisë, ka kërkuar që të mos paraqitet më në Shërbimin e Provës, duke argumentuar se gjendja e saj shëndetësore kërkon lehtësim të kushteve aktuale. Aktualisht, ndaj saj është vendosur masa “detyrim për t’u paraqitur”, në kuadër të hetimeve ku ajo dyshohet për përfshirje në disa vepra penale.
Kërkesa e saj vjen në një moment të ndjeshëm familjar, pasi ajo dhe Veliaj janë në pritje të fëmijës së tyre të dytë, ndërkohë që kryebashkiaku i Tiranës ndodhet në paraburgim prej më shumë se një viti.
Gjatë seancës së fundit në GJKKO, prokurori Ols Dado bëri publike edhe disa deklarata të dhëna nga Veliaj gjatë komunikimit me oficerët e burgut. Sipas tij, Veliaj ka reaguar ashpër ndaj hetuesve, duke i akuzuar për dëmtim të familjes së tij dhe duke përmendur edhe humbje të mëparshme personale.
Ndërkohë, gjykata pritet të vendosë nëse do të pranojë kërkesën për ndryshimin e masës së sigurisë, duke marrë në konsideratë gjendjen shëndetësore dhe rrethanat aktuale të të pandehurës.