Një aksident i rëndë rrugor ka tronditur Italinë, duke i marrë jetën dy të rinjve shqiptarë, të dy rreth 20 vjeç. Ngjarja tragjike ka ndodhur kur automjeti me të cilin ata udhëtonin është përplasur fuqishëm me një kamion.
Sipas mediave italiane, përplasja ka qenë e fortë dhe fatale për dy të rinjtë, të cilët kanë ndërruar jetë në vendin e ngjarjes. Identiteti i viktimave nuk është bërë ende publik nga autoritetet.
Në automjet ndodhej edhe një grua, e cila ka mbetur e plagosur rëndë. Ajo është transportuar me urgjencë në spital, ku ndodhet në gjendje kritike dhe nën kujdesin e mjekëve.
Autoritetet italiane kanë nisur hetimet për të zbardhur shkaqet dhe rrethanat e aksidentit, ndërsa trafiku në zonë u bllokua për disa orë. Ngjarja ka shkaktuar dhimbje dhe tronditje të madhe, veçanërisht në komunitetin shqiptar në Itali.