Jani Aliaj, një nga personat më të kërkuar nga drejtësia shqiptare për vrasje, është ekzekutuar sot brenda burgut grek të Koridhalos. Ngjarja ka ndodhur në sektorin 3 të institucionit të vuajtjes së dënimit, ku 49-vjeçari nga Tepelena u godit për vdekje me thikë nga një i burgosur grek.
Sipas autoriteteve greke, autori i dyshuar i vrasjes është gjithashtu i dënuar për vrasje. Policia ka nisur hetimet për zbardhjen e plotë të rrethanave të ngjarjes, duke mos përjashtuar pistën e një vrasjeje me pagesë.
Aliaj ndodhej në paraburgim në Greqi që prej 31 dhjetorit 2024 dhe ishte në proces ekstradimi drejt Shqipërisë. Ai rezulton i dënuar me burgim të përjetshëm për vrasjen e Elton Çiços, ngjarje e ndodhur më 1 maj 2016 në zonën e ish-Bllokut në Tiranë. Po ashtu, ai kërkohej edhe për një tjetër ngjarje kriminale të vitit 2015 në Përmet, ku gjatë një tentative për vjedhjen e një sasie të madhe marijuane mbetën persona të plagosur, çështje për të cilën akuzohej për tre vepra penale.
Në Greqi, Jani Aliaj ishte në kërkim pasi ishte arratisur nga burgu i Korfuzit, ku vuante një dënim të rëndë me burgim të përjetshëm, si dhe 2 vite e 12 muaj shtesë për vrasjen e një shtetasi shqiptar, plagosje të rëndë dhe armëmbajtje pa leje, ngjarje të ndodhura në Athinë në vitin 2006. Në momentin e arrestimit të fundit, ai përdorte identitetin e rremë Aleksan Kreshnik.
Autoritetet greke dhe shqiptare pritet të bashkëpunojnë për hetime të mëtejshme lidhur me ekzekutimin e tij brenda burgut, ndërsa ngjarja ka ngritur pikëpyetje serioze mbi sigurinë në institucionet penitenciare greke.