Edmond Gjyzeli dhe Izmir Kusi janë dy persona që po verifikohen nga grupi hetimor, pasi dyshohet se gjatë muajve të fundit kanë zhvilluar disa takime me Altin Ndocin në paraburgimin e Durrësit.
Sipas burimeve nga hetimi, të dy emrat rezultojnë të skeduar nga organet e drejtësisë dhe ekzistojnë dyshime se mund të kenë qenë të përfshirë ose të kenë pasur dijeni për planin e arratisjes së Ndocit. Hetimet ndodhen ende në fazë paraprake dhe po punohet për sigurimin e provave që mund të konfirmojnë ose përjashtojnë përfshirjen e tyre. Deri më tani nuk dihet nëse hetuesit kanë arritur t’i lokalizojnë për t’i marrë në pyetje.
Ndërkohë, Gjykata e Durrësit ka caktuar masën e sigurisë “arrest në burg” për ish-drejtorin e Institucionit të Ekzekutimit të Vendimeve Penale Durrës, Indrit Cërloj. Ai akuzohet për shpërdorim detyre në lidhje me arratisjen e të paraburgosurit Altin Ndoci.
Në kuadër të të njëjtit hetim, është arrestuar edhe mjekja Ylvete Sema, 65 vjeçe, ndaj së cilës gjykata ka vendosur masën e sigurisë “arrest shtëpie”.
Dy ditë më parë, ministri i Drejtësisë, Besfort Lamallari, firmosi shkarkimin e Indrit Cërloj nga detyra e drejtorit të IEVP Durrës. Vendimi u mor një ditë pas arratisjes së Altin Ndocit, i cili ishte shoqëruar për kontroll mjekësor në spitalin e qytetit.