Kamber Sulçaj, i dyshuari kryesor për vrasjen e biznesmenit italian Edoardo Sarchi, është vetëdorëzuar sot në Policinë e Gjirokastrës, disa ditë pas ngjarjes së rëndë që tronditi zonën e Tepelenës.
Burime zyrtare konfirmojnë se Sulçaj është paraqitur në ambientet e policisë së bashku me armën e krimit, një armë zjarri me të cilën dyshohet se ekzekutoi 44-vjeçarin italian, pas një konflikti të çastit.
Në momentin e dorëzimit, Sulçaj ka refuzuar të japë deklaratë për Policinë, duke u shprehur:
“Nuk do të jap asnjë shpjegim sot, por do të flas në një fazë të mëvonshme, në praninë e avokatit”.
Krimi ndodhi pak pas mesnatës së 27 shtatorit 2025, në aksin rrugor Nivicë-Salari. Sipas të dhënave të deritanishme nga hetimet, konflikti fatal nisi për një sherr banal, të shkaktuar nga dritat e gjata të automjetit që drejtonte viktima, Edoardo Sarchi, i cili shoqërohej nga tre shtetas shqiptarë: Eqrem, Daniel dhe Gazment Braçi.
I irrituar nga dritat, Kamber Sulçaj është konfliktuar fillimisht verbalisht me ta, përpara se të qëllonte me armë në drejtim të automjeteve dhe personave të përfshirë. Si pasojë e të shtënave, Sarchi mbeti i vdekur, ndërsa fatmirësisht shokët e tij nuk u lënduan.
Prokuroria ka ngritur ndaj Kamber Sulçajt disa akuza të rënda:
Vrasje në rrethana cilësuese, e kryer në mënyrë të rrezikshme për jetën e shumë personave
Armëmbajtje pa leje
Prodhim dhe shitje të lëndëve narkotike
Policia dhe Prokuroria e Gjirokastrës po vazhdojnë hetimet për zbardhjen e plotë të ngjarjes, ndërsa Kamber Sulçaj pritet të merret në pyetje në ditët në vijim, në prani të mbrojtjes ligjore.
Ngjarja ka ngjallur reagime të forta në opinionin publik dhe diplomacinë italiane në Shqipëri, duke shtuar presionin për një hetim të shpejtë, transparent dhe të plotë.