Studioja e njohur daneze BIG (Bjarke Ingels Group), e udhëhequr nga arkitekti vizionar Bjarke Ingels, është shpallur fituese e konkursit ndërkombëtar për projektimin e “Parkut të Besimit” në Tiranë — një projekt ambicioz që synon të shndërrojë një pjesë të kryeqytetit në një hapësirë unike bashkëjetese ndërfetare.
BIG, e njohur për ndërhyrjet e saj urbane inovative dhe të qëndrueshme në qytete si Nju Jorku, Kopenhageni, Londra dhe Dubai, është vlerësuar për konceptin që ndërthur arkitekturën moderne me historinë, kulturën dhe tolerancën fetare shqiptare.
Në këtë konkurs morën pjesë 12 studio ndërkombëtare nga vende si Mbretëria e Bashkuar, Portugalia, Danimarka, Gjermania, Spanja, Meksika, Belgjika, Holanda dhe Italia, me ide të guximshme për këtë projekt simbolik. Por në fund, juria ndërkombëtare e cilësoi propozimin e BIG si “më përfaqësuesin dhe më universalin në reflektimin e frymës shqiptare të bashkëjetesës paqësore ndërmjet besimeve”.
Gjatë shpalljes së fituesit, Kryeministri Edi Rama theksoi rëndësinë e procesit dhe cilësinë e lartë të propozimeve të paraqitura:
“Ky ishte një proces nga i cili mësuam të gjithë. Kishte shumë ide për t’u diskutuar dhe analiza të detajuara për çdo projekt. Në fund, përzgjedhja ishte e vështirë, sepse të gjithë finalistët kishin sjellë propozime të jashtëzakonshme. Por projekti fitues na dha bindjen e plotë se do të sjellë diçka të jashtëzakonshme për vendin tonë.”
“Parku i Besimit” do të ndërtohet në një peizazh kodrinor prej 210,000 metrash katrorë, pranë luginës së Erzenit, në zonën e Petrelës. Ai do të përfshijë ndërtesa të frymëzuara nga elementë të trashëgimisë arkitekturore shqiptare dhe ndërfetare, të cilat do të shërbejnë si hapësira reflektimi, dialogu, edukimi dhe përjetimi kulturor.
Sipas vizionit të BIG, ndërtesat do të jenë të shpërndara në natyrë, duke krijuar ndjesinë e një pelegrinazhi të qetë përmes rrugicave dhe pyjeve, ndërsa arkitektura do të ruajë simbolikën fetare tradicionale, e interpretuar në formë moderne dhe minimaliste. Projekti do të jetë ekologjik, i qëndrueshëm dhe i hapur për të gjithë, pa dallime fetare.
Synimi është që Shqipëria, përmes këtij projekti, të përcjellë një mesazh të fuqishëm paqeje dhe tolerance nga zemra e saj – Tirana – duke u bërë një model unik në rajon dhe më gjerë.
Parku pritet të presë rreth 30,000 vizitorë në vit, me hapësira për evente deri në 500 persona. Çmimi për fituesin e konkursit ishte 40,000 euro, ndërsa kostoja e përgjithshme e projektit parashikohet të jetë në disa miliona euro, megjithëse nuk është publikuar ende një dokument zyrtar mbi vlerën përfundimtare të tij.