Koreja e Jugut është tronditur nga vrasja tragjike e influencueses në TikTok, Yoon Ji-Ah, e cila u gjet pa jetë më 11 shtator në qarkun Muju të Provincës North Jeolla. Sipas mediave vendase, ajo u zbulua me shenja dhune dhe shtrëngimi në qafë, ndërsa autopsia konfirmoi se vdekja ishte shkaktuar nga asfiksia për shkak të kompresimit të qafës. Hetimet tregojnë se sulmi ndodhi rreth 30 minuta pasi ajo kishte përfunduar një transmetim të drejtpërdrejtë, ndonëse ai ishte realizuar në një vend tjetër, rreth tre orë larg nga vendi ku u gjet trupi i saj.
I dyshuari kryesor është një burrë rreth të pesëdhjetave me emrin Choi, i cili kishte ndërtuar një identitet të rremë përpara Yoon Ji-ah, duke u paraqitur si CEO i suksesshëm në fushën e teknologjisë. Në realitet, ai ishte thellësisht i zhytur në borxhe dhe shtëpia e tij ishte sekuestruar. Në komunitetin e transmetimeve live, ai njihej me pseudonimin “Macja e Zezë” dhe ishte një nga mbështetësit më të mëdhenj financiarë të saj, duke dhuruar mbi 70 mijë dollarë.
Marrëdhënia mes tyre u bë e tensionuar kur Yoon Ji-Ah kërkoi të shkëputej prej tij për shkak të sjelljes së tij kontrolluese dhe kërkesave të tepruara. Pamjet e kamerave të sigurisë tregojnë momentin kur ajo u pengua me forcë të largohej nga makina e tij. Familja e saj deklaroi se ajo kishte shprehur shqetësim për sjelljen e tij. Para ngjarjes tragjike, Choi ishte parë duke iu lutur në gjunjë që të mos e ndërpriste lidhjen me të.
Ai u arrestua më 13 shtator dhe fillimisht mohoi çdo përfshirje në ngjarje, por më pas pranoi fajin pasi u informua se trupi i Yoon Ji-Ah ishte gjetur. Ndryshimet në dëshminë e tij dhe detajet e ngjarjes kanë shkaktuar zemërim dhe tronditje në mbarë opinionin publik në Korenë e Jugut.