SPAK ka goditur një grup kriminal që vepronte në zonën e Gjirit të Lalzit, i përfshirë si në vrasje me pagesë, ashtu edhe në tjetërsimin e pronave përmes falsifikimit të dokumenteve. Hetimi, i ndarë në dy çështje të veçanta, lidhet me aktivitetin e dy grupeve të njohura kriminale: atë të Avdylajve dhe atë të Aleksandër Lahos, të njohur si “Rrumi i Shijakut”.
Sipas dosjes hetimore, disa prej personazheve të dyshuar rezultojnë të përfshirë në të dyja çështjet. Me kërkesë të SPAK, Gjykata e Posaçme (GJKKO) ka lëshuar nëntë masa sigurie, prej të cilave pesë janë ekzekutuar, ndërsa katër persona të tjerë vijojnë të jenë në kërkim. Prokurorët e dosjes janë Altin Dumani dhe Adnan Xholi.
Të arrestuarit janë:
- Vullnet Muça, vëllai i Aleksandër Lahos
- Enea Kume, vëllai i deputetit Loer Kume
- Vlash Brahja
- Astrit Avdylaj, i njohur edhe si Astrit Balliu (aktualisht në burg si pjesë e operacionit “Revanshi”)
Gjithashtu, për Edlira Avdylajn është vendosur masa “ndalim i daljes jashtë vendit”, e cila është ekzekutuar.
Në kërkim vijojnë të jenë:
- Elidon Avdylaj, i njohur si Aldo Abdylaj
- Aleksandër Laho (“Rrumi i Shijakut”)
- A.B. dhe A.D.
Grupi kriminal dyshohet për dy episode kryesore: një vrasje me pagesë dhe skema të tjetërsimit të pronave në Gjirin e Lalzit përmes dokumenteve të falsifikuara. Në kuadër të hetimeve, SPAK ka sekuestruar 11 pasuri me sipërfaqe totale prej 254.300 m² në zonën bregdetare të fshatit Shetaj, Durrës.