Kryeministri Edi Rama ka reaguar pas publikimit dhe shpërndarjes së gjerë të një videoje që e tregon në një bisedë joformale me Presidentin e Francës, Emmanuel Macron, dhe Presidentin e Azerbajxhanit, Ilham Aliyev, ku bënin humor me lapsusin e përsëritur të ish-Presidentit amerikan Donald Trump, i cili shpesh ka ngatërruar Shqipërinë me Armeninë në deklaratat e tij publike.
Në një reagim të bërë në rrjetin social X, Rama thekson se ky moment është nxjerrë nga konteksti dhe është interpretuar në mënyrë të gabuar nga mediat, përfshirë edhe ato ndërkombëtare. Ai sqaron se e gjithë situata ishte thjesht një moment humori mes miqsh dhe nuk përbënte asnjë qëndrim politik apo koment për të fyer askënd.
Rama shpreh keqardhje për mënyrën se si një fjali e thënë me tone humori është kthyer në një kryelajm global, ndërsa sipas tij, substanca e vërtetë e Samitit të Komunitetit Politik Europian në Kopenhagen më 2 tetor 2025, ku mori pjesë edhe vetë, mbeti në hije.
Ai thekson se ndodhej në një bisedë të lirë me Presidentin Aliyev dhe Presidentin Macron, ku me humor i referohej një lapsusi të njohur të Presidentit Trump, i cili kishte thënë më parë se Shqipëria kishte bërë paqe me Azerbajxhanin, ndërkohë që realisht bëhej fjalë për Armeninë. Rama thekson se kjo ishte thjesht një vërejtje e lehtë në një moment miqësor dhe nuk duhet të keqinterpretohet si ndonjë qëndrim kritik.
Në fund të reagimit, Kryeministri shqiptar vlerëson rolin e Donald Trump në proceset e paqes ndërkombëtare, duke thënë se ai ka arritur të sjellë paqe në zona ku shumë të tjerë kishin dështuar, dhe se ka rikthyer termin “paqebërës” në fjalorin perëndimor. Ai shton se ky shkëmbim me liderët e tjerë nuk ishte gjë tjetër veçse një moment i këndshëm humori midis miqve, të cilët, sipas tij, janë ndër admiruesit më të mëdhenj të Presidentit Trump.
