Presidenti francez Emmanuel Macron ka shpallur se Franca e ka njohur zyrtarisht shtetin palestinez, duke u bërë një nga fuqitë kryesore evropiane që ndërmerr këtë hap historik. Ky vendim shihet si një përpjekje për të rritur presionin mbi Izraelin, i cili vazhdon fushatën ushtarake në Gaza pavarësisht indinjatës së gjerë ndërkombëtare.
Një ditë më parë, edhe Britania, Kanadaja, Australia dhe Portugalia shpallën njohjen e shtetit palestinez, duke krijuar një valë të re përkrahjeje ndërkombëtare për kauzën palestineze.
Ndërkohë, Shtetet e Bashkuara mbeten kundërshtari më i ashpër i këtij procesi. Presidenti amerikan Donald Trump pritet të flasë nesër në Asamblenë e Përgjithshme të OKB-së, ku pritet të ritheksojë pozicionin e Washington-it kundër njohjes së shtetit palestinez. Kryeministri izraelit Benjamin Netanyahu ka përsëritur se “nuk do të ketë shtet palestinez,” duke lënë të kuptohet se Tel Avivi nuk do të pranojë presionet ndërkombëtare.
Situata në terren mbetet dramatike. Të paktën 50 palestinezë u vranë dje nga sulmet ajrore izraelite në Gaza, ndërsa sipas Ministrisë së Shëndetësisë në enklavë, numri i viktimave që nga fillimi i luftës ka kaluar mbi 65 mijë.
Njohja e shtetit palestinez nga një numër gjithnjë e më i madh vendesh shihet si një moment kyç në përpjekjet për të gjetur një zgjidhje politike të konfliktit. Megjithatë, përballja e drejtpërdrejtë mes qëndrimeve të fuqive perëndimore dhe refuzimit të hapur nga Izraeli dhe SHBA, tregon se rruga drejt paqes mbetet e gjatë dhe e vështirë.