Ditën e djeshme mediat pasqyruan sesi policia e shtetit ka nxjerrë me dhunë disa studentë nga zyra për regjistrimin në konvikte, duke treguar dhe njëherë problematikat e mëdha që të rinjtë kalojnë çdo fillim sezoni shkollor, për t’u sistemuar në konvikte.
Shkak për përplasjet e fundit ka qenë godirna nr.3 në Qytetin Studenti, që është godina më e re dhe me kushte më të mira, dhomat e së cilës u zhdukën pa nisur ende shpërndarja e tyre.
“Videot filmike të kamerave janë në dorën e administratës për ti bërë publike dhe ne kemi thënë më herët që këto ngjarje duhen hetuar nga prokuroria pasi nuk mund të regjistrosh miq e shokë para studentëve që presin në radhë”, tha aktivisti i “Qëndresa Qytetare” Mateo Yskollari.
Disa prej studentëve deklaruan madje se ishin në radhë që në orën 3 të mëngjesit dhe sërish mbetën pa dhoma.
View this post on Instagram
Drejtori i Rezidencës Studentore Universitare, Olsi Shahini, sqaroi jashtë kamerave për News24, se në procesin e regjistrimit të ditës së enjte, radha është respektuar dhe se për këtë është i gatshëm të vendosë në dispozicion kamerat e ambientit.
Situata për studentët që duan të shkollohen në Tiranë sakaq sa vjen e vështirësohet çdo vit, duke mos gjetur akomodim në konvikte dhe duke u përballur me çmimet e qirave të kryeqytetit që nuk njohin rënie.