Albin Gashi zyrtarisht nuk është më një futbollist i Kukësit. Mesfushori me tipare ofensive nuk ishte në planet e trajnerit Diego Longo, i cili përgjatë këtij sezoni i kishte dhuruar vetëm 113 minuta dhe ato të marra në fillimin e kampionatit, saktësisht në 3 ndeshjet e para, ndaj Egnatias, Kastriotit dhe Laçit.
Prej atij momenti, 24-vjeçari është ulur vazhdimisht në stol në rolin e spektatorit, ndërsa në tre sfidat e fundit nuk ka qenë fare pjesë e ekipit. Ndaj, duke njohur situatën, të dyja palët kanë vendosur të ndajnë rrugët, teksa ditën e sotme nëpërmjet një njoftimi në faqen zyrtare, Kukësi sqaroi se për arsye familjare, futbollisti do të largohet drejt Austrisë, aty ku është edhe vendlindja e tij.
Njoftimi i Kukësit:
Njoftim i klubit!
Futbollisti Albin Gashi nuk është më pjesë e skuadrës sonë! Sulmuesi 24-vjeçar ka kërkuar nga klubi që të largohet në drejtim të Austrisë arsye familjare dhe klubi e ka mirëkuptuar kërkesën e futbollistit duke e lënë të lirë.
Klubi i Kukësit e falënderon Gashin për kontributin e dhënë për fanellën e Kukësit dhe i uron shumë suksese në karrierën e tij futbollistike.