Rruga e Arbrit është hapur provizorisht sot, ndërsa kryeministri Edi Rama ishte i pranishëm në ceremoninë e organizuar.
Ai është pritur me daulle dhe në ritmet këngëve popullore të zonës së veriut, ndërsa vendasit kishin veshur kostumet popullore shqipatare.
Rruga kalohet me bypass në Tunelin e Murrizit, pasi për shkak të formacioneve gjeologjike komplekse, puna ka ecur më ngadalë dhe përfundon në pranverë.
Rruga do të bëhet për vetëm 47 minuta, nga 1 orë e 20 minuta që bëhet sot ose nga 4 orë që bëhej më parë.
Ministria e Infrastrukturës dhe Energjisë njofton se Rruga e Arbrit u bë e kalueshme për të gjitha mjetet duke nisur nga ora 14:00.
MIE tërheq vëmendjen e drejtuesve të mjeteve, që të bëjnë kujdes në rrugë, për shkak të kushteve të motit, veçanërisht në zonën e bypass-it të Murrizit.
Burreli, Klosi, Bulqiza dhe Peshkopia nëpërmjet Rrugës së Arbrit do të jenë të aksesueshme të gjitha brenda dy orëve.
Rruga përbëhet nga 6 tunele, 4 ura, mes tyre ura e Vashës dhe e Fshatit, ndër më të lartat në rajon dhe pjesa tjetër korsi e asfaltuar me dy sense në një total prej 70 kilometrash.
Në tunelin e Murrizit automjetet mund të qarkullojnë nëpërmjet bypass-it deri në përfundim të punimeve.
Rruga e Arbrit përfundon në Bllatë, kufi me Maqedoninë e Veriut, duke lidhur Shqipërinë me Dibrën e Madhe, Gostivarin dhe Tetovën.
