Xhudistja kosovare, Erza Muminoviq ka fituar medalje të bronztë në kuadër të Kampionatit Botëror U21 të xhudos, që po mbahet në Olbia të Italisë.
Komiteti Olimpik i Kosovës tha se Erza Muminoviq ka fituar tri luftëra, ndërsa një tjetër e ka kaluar pa luftë në kategorinë -52 kg.
Trajneri kosovar i xhudos Driton Kuka, konsideroi se ishte një ditë e shkëlqyeshme për Erzën, e cila fitoi medaljen e saj të parë botërore.
“Mposhti garuesen nga Mongolia, atë nga SHBA-ja dhe nga Azerbajxhani, ndërsa pas arritjes në gjysmëfinale u mposht nga italiania, tre me dy, me dënime”, shkroi Kuka në rrjetet sociale.
Trajneri Kuka tha se në luftën për medaljen e bronztë, Erza Muminoviq ka mposhtur xhudisten spanjolle Ariane Toro Soler “në mënyrë të sigurt dhe i siguroj vendit tonë medaljen botërore”.
Ekipi i xhudos së Kosovës përpos xhudistet Erza Muminoviq, po merr pjesë në këtë garë edhe me xhudisten Fationa Kasapi në kategorinë -57kg e cila do të ndeshet të enjten dhe në ndeshjen e parë do të takohet me ukrainasen, Vladyslava Snitko.
Në këtë Kampionat po marrin pjesë 72 shtete, 495 garues, 285 meshkuj dhe 210 femra.