Kryeministri Edi Rama ka reaguar pas trazirave të krijuara në koncertin e Goran Begoviç në Korçë.
Përmes një postimi në rrjete sociale, bashkangjitur performancës së Goran Bregoviç, Edi Rama u është përgjigjur akuzave dhe polemikave me argumentin e një gazetareje, shqiptare e Kosovës, që sipas tij e kanë thënë troç që artisti nuk ka lidhje me asnjë prej të zezave që i janë faturuar në Tiranë dhe Prishtinë.
Një ditë pas koncertit të Bregoviç ku pati dhe hedhje të gazit lotsjellës nga një i ri, Rama thotë se akuzat erdhën nga një “histerie mesjetare, që shpërtheu kundër një muzikanti nga më të jashtëzakonshmit e Ballkanit” e krijuar nga politikanë që kërkojnë të krijojnë vetëm armiqësi duke e cilësuar Bregoviçi si “kriminel serb”, pavarësisht se as serb nuk është.
Kujtojmë se, ndërsa Goran Bregovic ishte duke performuar në skenën e Festës së Birrës në Korçës, gaz lotsjellës është hedhur në drejtim të turmës në 3 zona të ndryshme madje edhe në afërsi të tavolinave ku ndodheshin të ftuarit kryesorë të mbrëmjes së djeshme. Autori u identifikuara nga policia si Redon Leka, 21 vjeç, banues në Tiranë me precedent penal.
Postimi i plotë:
ZJARRI KINSE PATRIOTIK I GUSHTIT
Një gazetare e mirënjohur shqiptare e Kosovës, e cila respektohet ndërkombëtarisht dhe kontribuon për tribuna prestigjoze të shtypit botëror, e tha shumë troç se Goran Bregoviçi nuk ka asnjë lidhje, me asnjë prej të zezave që iu faturuan nga zjarrnxitës mendjefikur, sa në Prishtinë dhe sa në Tiranë.
Por muzikanti i famshëm nga Sarajeva, me baba kroat, nënë serbe dhe grua muslimane boshnjake, u kthye në një “kriminel serb” që duhej djegur në zjarret e gushtit shqiptar, pavarësisht se as serb nuk është përveç të tjerash. Paçka se Bregoviçi nuk ka thënë asgjë kundër shqiptarëve, nuk i ka kënduar asfare masakrave të regjimit të Millosheviçit dhe nuk ka qenë gjëkundi mbështetës i atij regjimi as me fjalë as me vepra, e vërteta as që kishte rëndësi. Rëndësi kishte zjarri i politikës qorre, e cila krijon armiq, ushqehet armiqësisht dhe jeton për armiqësinë – thënë aq bukur nga një prej zjarrnxitësve mendjefikur, “Më pëlqen ta dëgjoj Bregoviçin, po nuk shoh dot me sy Edi Ramën!”.
Askush, hiç askund, nuk e dha asnjë provë të vetme për ta justifikuar histerinë mesjetare që shpërtheu kundër një muzikanti nga më të jashtëzakonshmit e Ballkanit. Ishte një histeri fashiste, e turpshme per qytetarinë europiane të shqiptarëve, për historinë dhe për traditën tonë po ashtu, e cila fatkeqësisht nuk dallonte aspak nga histeritë linçuese të grupeve fashiste kudo në botë.
Ku ndryshojnë për shembull ata që në Serbi i hakërrehen me fjalorin më të ndyrë Dua Lipës në rrjetet e saj sociale, vetëm pse ajo është një shqiptare krenare e Kosovës, e cila del mbështjellë me të dy flamujt e shteteve tona, me ata që iu hakërryen me shqipen më të ulët në rrjetet tona sociale Goran Bregoviçit, duke e trajtuar si një kriminel lufte e duke i mveshur faje që ai nuk i ka bërë vetëm se ai këndon serbisht?
Ndryshojnë vetëm në faktin se të parët shajnë e mallkojnë serbisht, ndërsa të dytët sharjet e mallkimet i lëshojnë në shqip. Të dyja palët i përkasin besnikërisht kategorisë së ulët njerëzore të urrejtësve të verbër, të cilës kjo botë i ka parë vetëm sherrin, kudo e kurdo që ajo ka arritur të imponojë mbi shoqërinë verbërinë e vet.